Lənkəranda polis Kərgəlan, Şağlakücə, Haftoni və Ləj kəndlərindəki örüş sahələrindən ümumilikdə 17 nəfərə məxsus mal-qaranı oğurlayan şəxsləri saxlayıb. Onların Cəlilabad rayon sakinləri, əvvəllər külli miqdarda narkotik vasitənin qanunsuz dövriyyəsi, qanunsuz silah saxlama, gəzdirmə maddələri ilə məhkum olunmuş Anar Sarxanov və cəzaçəkmə müəssisəsində birlikdə cəza çəkdiyi Ramil Əliyev olduqları müəyyən edilib. Məlum olub ki, şəxslər örüş sahələrindən oğurladıqları mal-qaranı Sarxanovun idarə etdiyi “Ford” markalı yük avtomobili ilə müxtəlif rayonların ərazisindəki heyvan bazarlarına apararaq orada satıblar. Ramil Əliyevin üzərindən “Makarov” tipli tapança və həmin silaha aid 3 ədəd patron da aşkarlanaraq götürülüb. Ramil Əliyevin odlu silahı cəzaçəkmə müəssisəsində birlikdə cəza çəkdiyi digər şəxsdən, Salyan sakini Rövşən Mehtiyevdən əldə etdiyi müəyyən edilib. Saxlanılaraq istintaqa təqdim edilən Mehtiyev silahı artıq vəfat etmiş atasından əldə etdiyini bildirib. Faktla bağlı araşdırma aparılır.