Haqqımızda

Kəpəz Müstəqil Teleradio Şirkəti

"Kəpəz Müstəqil Teleradio Şirkəti" 1993-cü ildə yaradılıb və Gəncə şəhərində 46-cı kanalla yayımlanıb.

2008-ci ilin iyunun 4-də Kəpəz TV-də yeni dövr başlanıb. Təşkilati-hüquqi forması dəyişdirilən televiziyaya yeni kadrlar cəlb olundu, yeni verilişlər hazırlandı. Bu gün “Kəpəz”in efirində cəmiyyətdə aktuallığını saxlayan mövzularla yanaşı, mədəniyyət və tariximizlə bağlı maarifləndirici xarakterli verilişlər də yayımlanır.

Hazırda 24 saat efirdə olmaqla telekanalda 20-dən artıq veriliş yayımlanır. “Bu səhər” informasiya kanalı, “Tac şou” əyləncəli veriliş, “Piyada” intellektual proqramı, “Zirvə” bilik yarışı, “Duyğulu könüllər” kimi verilişlər tamaşaçıların ixtiyarındadır. Xəbərlər Xidmətinin istehsalı olan “Kəpəz xəbər”, “İdman xətti”, “Kapital”, “Aqronom”, “Hadisə”, “Bu həftə” isə birbaşa insanların informasiya tələbatını ödəməyə xidmət edir.

Televiziyanın nəzdində Dublyaj redaksiyası da fəaliyyət göstərir ki, bununla da ən son kinoların, cizgi və sənədli filmlərin öz ana dilimizdə səsləndirilməsi həyata keçirilir.

2009-cu ilin 4 iyun tarixindən etibarən telekanalın www.kepeztv.az saytı da istifadəyə verilib ki, izləyicilər həmin vebsayta daxil olaraq ölkədə və regionda baş verən ən son xəbərləri, istədikləri verilişləri izləyə bilərlər...

2008-ci ildən başlanan və tamaşaçıların da çoxdan gözlədiyi dəyişikliklərin davamı olaraq Kəpəz televiziyası üçün yeni bina inşa edildi, 2012-ci ilin sentyabr ayından istifadəyə verilən möhtəşəm binada fəaliyyətinə davam edən Kəpəz TV ən müasir televiziya avadanlıqları ilə təchiz olunub və “Cinegy” texnologiyası əsasında Azərbaycanda ən böyük avtomatlaşdırılmış yayım sisteminə malikdir.

Televiziyada çalışanların sayı isə 220-dən artıqdır və onların burada keyfiyyətli iş ortaya qoyması üçün hər cür şərait yaradılıb. İşçilər peşəkarlıq səviyyəsinin daha da artırılması məqsədi ilə tez-tez müxtəlif seminar və kurslarda iştirak edir, Türkiyə, İngiltərə, Almaniya kimi xarici ölkələrdə təcrübə keçirlər.

Əhatə dairəsini də genişləndirən "Kəpəz" Televiziyası, 2015-ci ilin mart ayından etibarən Qərb bölgəsində analoq yayımından tam olaraq rəqəmsal yayıma keçib. Rəqəmsal yayımda Gəncə şəhəri və ətraf rayonlarda 24-cü kanalda, Qazax, Tovuz və Ağstafa rayonlarında isə 56-cı kanalda və Tovuz şəhərində 36-cı kanalda Kəpəz televiziyasını izləmək mümkündür.

Kəpəz MTRŞ MMC-də daha bir yenilik isə 93.3 MHz tezliyində Kəpəz FM-in istifadəyə verilməsi oldu. 2013-cü ilin fevral ayından yayımına başlayan regionun ilk radiosu bu gün kifayət qədər dinləyici auditoriyasına malikdir. Eyni zamanda radionun www.kepezfm.az saytı da istifadəçilərin ixtiyarına verilib.

Böyük inkişaf yolu keçən “Kəpəz” Müstəqil Teleradio Şirkəti 2014-cü ilin mart ayının 14-də bölgələrdə yerləşən digər 5 televiziya ilə birləşərək (RTV-Xaçmaz, CTV- Lənkəran, ELTV- Yevlax, Kanal S- Şəki və TTV-Tovuz) Milli Teleradio Şurasının keçirdiyi tenderdə iştirak edib. Nəticələrə əsasən Azərbaycan üzrə yayım hüququ əldə olunaraq Region TV-nin yaradılmasına nail olundu. "Region TV" 2014-cü ilin may ayından ümumrespublika yayımına başlayıb. Televiziya Bakı və Abşeron yarımadası ərazisində 37-ci tezlikdə (11 sektor) yayımlanır. Region TV-nin yayım mərkəzi Kəpəz TV-nin bazasında yaradılıb və Gəncə şəhərində yerləşir. Açıq yayımla yanaşı Region TV Azərbaycanın ilk peyki olan AzerSpace1-in Avropa seqmentində, kabel tv-lər, həmçinin internet vasitəsilə də yayımlanır. “Region TV” günə “Kəpəz” televiziyasının istehsalı olan “Bu səhər” canlı informasiya proqramı ilə başlayır. “Kəpəz”dən bu veriliş də olmaqla 14 proqram Region TV-nin tamaşaçılarına təqdim olunur.

 

Şirkətin idarə heyəti :

Kəpəz Müstəqil Teleradio Şirkətinin Baş Direktoru:

Cabarov Fuad Şamil oğlu 

Email: general.director@kepeztv.az

 

Xüsusi layihələr departamentinin direktoru:

Dərgahova Günel Namiq qızı

Email: gunel.babaeva@kepeztv.az

Xəbərlər xidmətinin direktoru:

Mehdiyev Fərid Siyavuş oğlu

Email: farid.mehdiev@kepeztv.az

İKT Departamentinin direktoru :

Dərgahov Nofəl Elbrus oğlu

Email: nofel.dergahov@kepeztv.az