Türkiyədə 2019-cu ilin noyabr ayının 11-dən etibarən hər il bu gün kütləvi şəkildə ağacəkmə aksiyası keçirilir və milyonlarla ağac əkilir. Artıq 11 noyabr tarixi qardaş ölkədə Milli Yaşıllaşdırma günü kimi qeyd edilir. Bu nəcib təşəbbüsə Türkdilli dövlətlər də qoşulur və ölkəmizdə də qeyd edilən tarixdə geniş yaşıllaşdırma tədbirləri həyata keçirilir. Bu məqsədlə Samuxda da ağacəkmə aksiyası baş tutub. Samux-Kür yolunun kənarında 3 hektar ərazidə həyata keçirilən aksiyada rayon rəhbərliyi, Türkiyənin Gəncədəki baş konsulu, şəhid ailələri, idarə, müəssisə və təşkilatların əməkdaşları və rayon gəncləri iştirak edib. Aksiya eyni zamanda ekoloji tarazlığın bərpasına, ətraf mühitin qorunmasına kömək etmək, atmosferi oksigenlə zənginləşdirmək, ictimaiyyətin diqqətini yaşıllıqların qorunmasına yönəltmək məqsədilə təşkil olunub. Aksiyada iqlim şəraitinə uyğun 1111 ədəd ağac əkilərək suvarılıb.

Orxan Cəfərzadə