Nikol Paşinyanın xüsusən "işğal altında olan 31 erməni kəndi" kimi uydurma hekayəni ortaya atması Ermənistanın hələ də işğal altında qalan 8 Azərbaycan kəndini qaytarmaq niyyətində olmadığını nümayiş etdirir. Bu fikirlər Qərbi Azərbaycan İcmasının Ermənistanın baş naziri Nikol Paşinyanın açıqlamaları ilə bağlı yaydığı bəyanatda vurğulanıb. Qeyd olunub ki, cəmiyyətdə mövqeləri getdikcə zəifləyən, komandadaxili problemlər yaşayan Nikol Paşinyan çıxış yolu kimi vəziyyəti qəsdən gərginləşdirməyə və sülh danışıqları prosesini dağıtmağa can atır. "Görünür, başda Fransa olmaqla bəzi ölkələrin silahları, Jozep Borel, Zəngəzur dağlarında macəra axtaranlar-Avropa İttifaqının Missiyası, "Yerkrapa" kimi quldur birləşmələri Ermənistanı "cəsarətləndirib". Ermənistan son vaxtlar seçdiyi təhlükəli xətdən imtina etməlidir", - deyə bəyanatda vurğulanıb.