Abşeronda oğul atasını qətlə yetirib. Abşeron rayon prokurorluğunun məlumatına görə, hadisə Hökməli qəsəbəsində ailənin yaşadığı evdə olub. İlkin araşdırmalarla 2004-cü il təvəllüdlü yeniyetmənin aralarında yaranmış mübahisə zamanı atasına bıçaqla çoxsaylı xəsarətlər yetirərək onu qəsdən öldürməsinə əsaslı şübhələr müəyyən edilib. Həyata keçirilən istintaq hərəkətləri və əməliyyat-axtarış tədbirləri nəticəsində hadisəni törədən şəxs tutularaq istintaqa cəlb edilib. Dindirilmə zamanı o, törətdiyi əməli tam etiraf edib. Hadisənin bəzi təfərrüatlarına əsasən, öldürülmüş şəxs narkotik aludəçisi olub. 1981-ci il təvəllüdlü həmin şəxs əvvəllər dəfələrlə narkotik vasitələrin aludəçisi və qanunsuz dövriyyəsi ilə məşğul olub, məhkumluq həyatı yaşayıb. Atanın azyaşlı oğlu tərəfindən bıçaqlanması məhz bu səbəbdən baş verib. Məlumata görə, o, narkotik almaq və istifadə etməklə bağlı evində mütəmadi mübahisələr yaradıb. Növbəti dəfə də o ailə üzvləri ilə bu məqsədlə mübahisə edib və nəticədə 2004-cü il təvəllüdlü oğlu tərəfindən bıçaqlanıb.Yaralı xəstəxanaya çatdırılsa da onun həyatını xilas etmək mümkün olmayıb.