Gəncəli futbolçu Tural Rzayev əməliyyat olunmalıdır. Yarımmüdafiəçi bunun üçün xaricə yollanmağı düşünür. Amma koronavirus pandemiyası ilə bağlı ölkədən çıxışın çətinləşməsi Rzayevi gözləmə mövqeyi tutmağa məcbur edib.

Futbolçu zədəni mart ayında yeni müqavilə baladığı Gürcüstanın I Divizonunda çıxış edən “Merani” klubunun sıralarında olarkən alıb. Gənc yarımmüdafiəçinin məşqlərin birində dizi burğulub. Tibbi personalın diaqnozundan sonra Turalın aldığı xəsarətin ağır olduğu müəyyənləşib və bu məqam əməliyyatı qaçılmaz edib.

Zədəsinə görə “Merani”də rəsmi debüt edə bilməyən orta xətt oyunçusu yalnız yoxlama görüşlərində meydana çıxıb. Qarşılıqlı razılıq əsasında müqaviləsinə xitam verilən Rzayev buna görə klubdan kompensasiya və əməliyyat üçün nəzərtə tutulan məbləği alıb. Turalın əməliyyatı Ukraynada olmalıdır.

Əməliyyat oluna bilməyən futbolçu geri qalan müddətdə passiv qalmayıb, yüngül təmrinləri yerinə yetirməklə əzələləri qorumağa çalışıb.

“Kəpəz”in Premyer Liqada çıxış etdiyi vaxtlarda oyunu ilə tanınmağa başlayan Gəncə futbol məktəbinin yetirməsi müəyyən dövr ərzində Litvanın “Yonava” klubunda da oynayıb.