Magistraturaya 44 və 70 saylı proqramlar üzrə qabiliyyət imtahanlarında iştirak etmək üçün qeydiyyat başa çatır. Jurnalistika üzrə magistratura ixtisaslaşmalarına və Azərbaycan Dövlət Rəssamlıq Akademiyasının xüsusi qabiliyyət tələb edən ixtisaslar üzrə magistraturasına qəbul olmaq istəyən və cari ilin qəbul imtahanındakı nəticələri müsabiqə şərtini ödəyən bakalavrlar ixtisaslaşma seçimindən əvvəl, bu gün saat 23:59-dək Dövlət İmtahan Mərkəzinin internet saytında qeydiyyatdan keçməli və qabiliyyət imtahanı verməlidirlər. Qabiliyyət imtahanlarında iştirak ödənişlidir və bu məbləğ 30 manatdır.

Bu arada, Dövlət İmtahan Mərkəzi ali təhsil müəssisələrinin magistraturalarına qəbul imtahanının nəticəsi müvafiq ixtisas qrupları üzrə minimal bal tələbini ödəyən, lakin fənlər üzrə minimal bal tələbini ödəməyən bakalavrlara proqram və ixtisaslaşma seçimində iştirak etmək imkanı verib. Dövlət İmtahan Mərkəzi və Təhsil Nazirliyinin birgə razılığına əsasən, həmin bakalavrların ödənişli plan yerlərinin müsabiqəsində iştirak etmələrinə icazə verilib. Proqram və ixtisaslaşma seçimi 8-18 iyunda həyata keçiriləcək. "Bakalavrın elektron ixtisaslaşma seçimi ərizəsi" səhifəsi gün ərzində DİM-in saytında aktiv ediləcək.