Deyirlər rahatlıqdır, əlaqədir, mədəniyyətdir və daha nələr. Söhbət yoldan gedir. Hansı ki, son illər Tovuz rayonunda da bu istiqamətdə az iş görülməyib. Kəndlərlə rayon mərkəzini birləşdirən kilometlərlə yol günün tələbləri səviyyəsində yenilənib. Nə heyif ki, şəhərin özü barədə bunları deyə bilmirik. Kələ-kötür, keçilməz yolların yaratdığı çətinliklərdən əməkdaşımızın Tovuzun müxtəlif küçələrindəki vəziyyətlə bağlı sujetini izləyək.

Görüntülər Tovuz şəhərinin Əhməd Cavad küçəsindəndir. Sonuncu dəfə asfaltın nə vaxt salındığını unudan sakinlər illərdir kələ-kötür yollardan istifadə etmək məcburiyyətindədirlər. Yararsız yollardan daha çox ziyan çəkənlər isə sürücülərdir. O sükan sahibləri ki avtomobillərinin təmirinə pul çatdıra bilmirlər.  

İsmayıl Məhərrəmov sürücü: Bir dənə alternativ yol bu yoldur. Bu da bərbad haldadır. Maşınlarımızın hamısı burada dağılır tökülür. Yalandan belə əl gəzdirilir yenə bir ayadan sonra eyni vəziyyətə düşür. Bizdə istəyirik ki şəhərimiz abadlaşsın yollarımız düzəlsin.

Sakinlərin sözlərinə görə, bəzi kommunal xidmətlərin yaxşılaşdırılması məqsədi ilə aparılan qazıntı işlərindən sonra mövcud asfalt örtüyündən əsər əlamət qalmayıb. Qazıntı işlərindən sonra isə yolların asfaltlanması nədənsə yaddan çıxıb.

Əmirxan Həbibov sakin: Yollarımız bərbad haldadır. Düzəltmək lazımdır. Cavan uşaqlardır görürsən təhlükə yaranır. Çoxu kələ-kötürdü deyə sınır sıradan çıxır.

Tovuzda avtomobillərin hərəkəti kimi piyadaların hərəkəti ürəkaçan deyil. Xüsusi ilə Tovuz Rayon Mərkəzi Xəsətəxanasına aparan yolda ümumiyyətlə səkinin olmaması həyatı təhlükə yaradır.  

Tahir Əliyev sakin: Yollarımız görürsüz çox bərbad vəziyyətdədir. Səkilərimiz sökülüb dağılır. Səki ilə getmək mümkün deyil. Məcbur olub yola çıxırıq. Yola çıxandada təhlükə yaranır.

sakin: Bir dənə yol salamat deyil. Səkilərimiz belədir. Xəstəxanaya qədər işıq çəkiblər. Heç biri yanmır. Hər şey hazırdır amma yanmır.

Tovuz rayonunun mərkəzində keçilməz yolların nə vaxt düzələcəyinə aydınlıq gətirmək üçün rayon İcra Hakimiyyətinin məsul şəxsləri ilə əlaqə saxladıq. İcra hakimiyyətindən şihafi olaraq verilən məlumata görə, yolların mövcud vəziyyətinin yaxşılaşdırılması istiqamətində yaxın vaxtlarda əməli işlərə başlanılacaq.

Natiq Hüseyn