Prokurorluq orqanlarının bütün səyləri, ilk növbədə Dövlət başçısının göstərişlərindən irəli gələn vəzifələrin yerinə yetirilməsinə, yeni iş metodlarını tətbiq etməyə qadir olan kadr korpusunun formalaşdırılmasına, möhkəm nizam-intizam yaradılmaqla neqativ təzahürlərin vaxtında aradan qaldırılmasını təmin edən işlək nəzarət mexanizminin yaradılmasına istiqamətləndirilmişdir. Gəncə Dövlət Universitetində şəhər prokuroru Fazil Həsənəliyevin kollektivlə görüşdə şəhərdə sabitlik əsasən qorunub saxlanıldığı və cinayətkarlığa qarşı aparılan mübarizənin öz səmərəsini verdiyi vurğulanıb. Vətəndaşların müraciətlərinə və qəbulu məsələlərinə xüsusi diqqətlə yanaşıldığı, ötən il 1021 vətəndaşın şikayətlə əlaqədar Gəncə şəhər prokurorluğunda qəbulda olduğu xatırladılıb. Görüşdə antimilli destruktiv qüvvələrin möhkəm özüllər üzərində təməli qoyulan ictimai-siyasi sabitlik və əmin-amanlığı pozmağa yönəlmiş hərəkətləri pislənilib, ictimai asayişi pozmaq cəhdlərinin qarşısının alınacağı, ekstremist çağırışlara qarşı barışmaz tədbirlərin davam etdiriləcəyi qeyd edilib.