Gəncə sakininin işləməyə getdiyi rayondan qazancı narkotik vasitə oldu. Gəncə Dəmir Yolu Stansiyası Xətt Polis Şöbəsinin əməkdaşları həmin şəxsi vağzalın peronunda saxlayıb. Onun üzərindən xeyli miqdarda marixuana aşkarlanıb.

Aylardır istixanalarda çalışıb gündəlik ehtiyacını ödəyən Gəncə sakininin sonradan köhnə peşəsinə qayıtmaq cəhdi uğursuz alınıb. 35 yaşlı Akif Abdullayev bir neçə ay öncə Şəmkirdə çalışdığı təsərrüfatın yaxınlığından əldə etdiyi marixuananı özü ilə Gəncədə gözdən könüldən qıraq yerə gətirmək istəyib. Ancaq Gəncə Dəmir Yolu Xətt Polisi Şöbəsi əməkdaşlarının sayıqlığı onun bu arzusunu ürəyində qoyub. Şübhəli şəxsin əlindəki sellofan torbaya baxış zamanı külli miqdarda narkotik vasitə olan marixuana aşkarlanıb.

Ramin Həmidov- baş təhqiqatçı: “1982-ci il təvəllüdlü Abdullayev Akif Ziyad oğlu Şəmkir rayonu ərazisindən istifadə etmək məqsədi ilə xüsusi ilə külli miqdar təşkil edən 2 kiloqram 32 qram çəkidə narkotik vasitə hesab edilən marixuananı əldə edib daşımış və Gəncə stansiyası Xətt Polis Şöbəsi əməkdaşlarının keçirdikləri əməliyyat-axtarış tədbirləri nəticəsində Akif Abdullayev Gəncə Dəmir Yolu Vağzalının ərazisində üzərində narkotik vasitəni gəzdirərkən yaxalanıb”.

Polisin araşdırması zamanı Akif Abdullayevin əvvəllər Rusiya Federasiyasında narkotik vasitələrin qanunsuz dövriyyəsi ilə məşğul olduğu üçün məhkumluq həyatı yaşadığı da üzə çıxıb. Saxlanılan şəxs uzun illərdir əsəb xəstəliyindən əziyyət çəkdiyini deyərək marixuananın müalicəvi əhəmiyyətindən ağız dolusu danışıb.

Akif Abdullayev- saxlanılan şəxs: “Açıq sahələrdə aparıb bişirmək istəyirdim. Orada elə yerdə etmək istəyirdim ki, çox adam görməsin. Onu bişirib suyunu içməliydim. Onu birdən- birə içmək olmaz. Onu yavaş-yavaş içməlisən. Bir həftə vaxt lazımdır”.

Akif Abdullayevin barəsində Cinayət Məcəlləsinin müvafiq maddəsi ilə iş başlanılıb. Əməli sübuta yetirilərsə onu 5 ildən 10 ilədək məhkumluq həyatı gözləyir.

Natiq Hüseyn