Azərbaycan-Türkiyə münasibətləri Prezident İlham Əliyevlə Türkiyəli həmkarı Rəcəb Tayyib Ərdoğan arasında müzakirə edilib. Dövlət başçısına zəng edən Ərdoğan Azərbaycanda keçirilən parlament seçkisində Yeni Azərbaycan Partiyasının inamlı qələbəsi münasibətilə dövlət başçısına təbriklərini çatdırıb. Türkiyə Prezidenti bu seçkinin Azərbaycanın suverenliyinin tam bərpa edilməsindən sonra ölkəmizin bütün ərazisində keçirilən ilk parlament seçkisi olmasının önəmini qeyd edib. Ərdoğan seçkinin azad, sərbəst, demokratik şəraitdə keçdiyini və Azərbaycan xalqının iradəsini əks etdirdiyini vurğulayıb. Telefon danışığı zamanı, 2 ölkə arasında parlamentlərarası əlaqələrin əhəmiyyəti və parlament nümayəndə heyətlərinin mütəmadi qarşılıqlı səfərləri qeyd olunub. Azərbaycanda keçirilən bu seçkidə Türkiyə Böyük Millət Məclisinin parlamentlərarası dostluq qrupunun müşahidəçi qismində geniş tərkibdə iştirak etdiyi bildirilib. Söhbət zamanı Azərbaycan ilə Türkiyə arasında qardaşlıq və strateji müttəfiqlik münasibətlərinin perspektivlərinə dair fikir mübadiləsi aparılıb.