Deputatlığa 8 nəfərin namizədliyinin təsdiqləndiyi 101 saylı Samux - Şəmkir seçki dairəsində 54332 nəfər səsəvermədə iştirak edəcək. Bu dairənin 32 məntəqəsi Samuxda 24-ü Şəmkirdə fəaliyyət göstərir. Siyahıda seçkiyə kimi 18 yaşı tamam olan 355 nəfər var. 80-100 yaş arası seçicinin sayı isə 819 nəfərdir. 280 seçicinin daşınan qutuya ərizə ilə müraciət etdiyi dairədə 9 məntəqə veb kamera ilə təchiz olunub. Əlilliyi olan vətəndaşlar üçün 10 məntəqə pandus quraşdırılıb. Seçimləri dairədə 795 müşahidəçi izləyəcək. Dairə üzrə bildirişlərin hamısı paylanıb və seçki öncəsi müəyyən cüzi işlər qalıb.

Bayram Qasımov - 101 saylı Samux - Şəmkir DSK-nın sədri : Mərkəzi seçki komissiyası tərəfindən verilən göstərişlər, təlimatlar təqvim planına uyğun olaraq yerinə yetirilib. Biz bülletenləri artıq Bakıdan mətbəədən almışıq. Bu gün bülletenlərin seçilib məntəqələrə paylanması üçün dairədə hazırlıq işləri gedir. Biz ayın 28-29-u həmin bülletenləri məntəqələrə çatdıracağıq. Biz seçkiyə 97 faiz hazırıq. Məntəqələr polisin mühafizəsi ilə bülletenlərlə təmin olunduqdan sonra işlərimiz yekunlaşacaq.

Dairənin 1 saylı məntəqəsində də seçki üçün bütün lazımi işlər həyata keçirilib. Bildirişlərin paylanması tamamlanıb, yekun seçici siyahısı tərtib olunub.

Diləfruz Qılıcova - 101 saylı Samux - Şəmkir DSK-nın 1 saylı MnSK-nın sədri : Nə tapşırıqlar verilib yerinə yetişmişik. Məlumatlandırıcı lövhələr hazırdır. Bizim məntəqədə 1351 seçicimiz var. Onlar arasında məktəbimizin məzunlarından ilk dəfə səs verənlər də var. Biz əlimizdən gələn qədər seçicilərin səsvermədə rahat, şəffaf şəkildə iştirakını təmin edəcəyik. Burada onlar üçün hər bir şərait yaradılıb.

Rayonda yerləşən 2 saylı məntəqə də tam şəkildə seçkiyə hazırdır. Bütün verilən göstərişlər, təlimatlar yerinə yetirilib, hazırlıqlar demək olar ki başa çatıb.

Əminə Cəfərova - 101 saylı Samux - Şəmkir DSK-nın 2 saylı MnSK-nın sədri : Samux - Şəmkir 101 saylı seçki dairəsinin 2 saylı məntəqəsi seçki prosesinə tam hazır vəziyyətdədir. Məntəqədə 1086 nəfər seçkilərdə iştirak edəcək. Onlar 5-i 18 yaşı tamam olanlardır, ilk dəfə səs verəcəklər. 2 nəfər seçicimiz 80-90 yaşlarında olan seçicilərdir. Siyahımızda olanlar 3 nəfər vəfat etdiyindən artıq siyahıdan çıxarılıb və seçici siyahımız yenilənib, heç bir problemimiz yoxdur.

Seçkidə ən çox diqqətçəkən məqam 100 yaşdan yuxarı seçicilərin səsvermədə iştirak etməsidir. 101 saylı Samux - Şəmkir seçki dairəsində də belə seçici var ki, onlardan biri rayonun Kolayır kəndində yaşayan 101 yaşlı Səfərova Zinyət Yaqub qızıdır.

Zinyət Səfərova - 101 yaşlı seçici : Bütün seçkilərdə iştirak etmişəm, indi də iştirak edəcək. Ən yaxşı namizədlərdən birini seçəcəm.

Zöhrab Səfərov - 101 yaşlı seçicinin oğlu : Prezident, parlament, bələdiyyə seçkilərində anam fəal iştirak edib. İlin əvvəlində keçirilən prezident seçkilərində də iştirak edib. İndi də parlament seçkilərində də səsverməyə getməyə hazırdır. Bütün seçkilərin hamısın iştirak edib, heç birindən imtina etməyib. Belə tədbirlə anam çox sevir, işgüzar adam olduğu üçün belə şeyləri qiymətləndirir.

Dairədə 101 yaşlı olan digər seçici isə Məhərrəmova Sara Fərhad qızıdır. Şəmkir rayon Kür qəsəbə sakini 42 saylı məntəqədə səs verəcək.