Meksikanın Azərbaycandakı Səfirliyinin təşkilatçılığı ilə Gəncədə “Sevgi Meksikadır” adlı məşhur konsert proqramı keçirilib. Çıxış edən Meksikanın Azərbaycandakı səfiri Mariya Viktoriya Romero Kabalyero iki ölkənin qədim tarixə, dövlətçilik ənənələrinə malik olduğunu vurğulayıb. Meksikalı ifaçıların Gəncədəki konsertinin maraqlı olacağını qeyd edən diplomat tamaşaçılara xoş seyrlər arzuyıb. Daha sonra meksikalı tenor Luis İtzkoatl və pianoçu Maurisio Duran səhnəyə çıxıblar. İfaçılar maraqlı proqramla çıxış ediblər. Proqrama Meksikanın milli vokal musiqi nümunələri və gənc bəstəkarlarının əsərləri daxil olub. Konsertin sonunda meksikalı musiqiçilər Gəncəli tamaşaçılara sürpriz edərək Azərbaycan mahnısı səsləndiriblər.

Mariya Viktoriya Romero Kabalyero- Meksikanın Azərbaycandakı səfiri: "Bu, mənim Gəncəyə ilk səfərim deyil. Bundan öncə də Gəncəyə gəlmişəm. O zaman cənab başçı ilə görüşüb gələcək əməkdaşlıqdan və perspektivlərdən danışmışdıq. Nə xoş ki, həmin səfərin davamı olaraq bu gün yenidən Gəncədəyik, konsert proqramı ilə çıxış edirik. Bu gün tamaşaçılara Meksika musiqisinin inciləri təqdim olundu. Hər kəsə təşəkkürümüzü bildiririk".

Aişə Rzayeva