“Kəpəz” doğma meydanda keçirəcəyi “Turan Tovuz”la derbiyə hazırdır. Böyük həyəcanla gözlənilən görüşöncəsi komanda hazırlıqlarını Gəncə şəhər stadionunun əsas meydançasında keçirdiyi son məşqlə başa vurub. Sonuncu hazırlıqda məşqçilər korpusu daha çox taktiki gedişlərdə oyunçulara xüsusi göstərişlər verib. Qarşıdakı oyunda sarı-göylər iki futbolçusunun xidmətindən yararlana bilməyəcək. Məşqlərin birində zədələnən kapitan Vurğun Hüseynov zədəsini sağaltmadığından görüşü buraxacaq. Elmir Tağıyev isə cəzalıdır. "Səbail"dən icarəyə götürülən yarımmüdafiəçi ötən mövsüm müqavilə ilə məxsus olduğu komandanın heyətində 4 oyun cəzalandığından diskvalifikasiya müddəti hələ başa çatmayıb. “Kəpəz” “Turan Tovuz”la sabah üz-üzə gələcək. Oyun saat 17:00-də başlayacaq.