Nizami yurdunda MMA üzrə elit kombat liqasında növbəti qəfəs döyüşləri keçirilib. Bu dəfəki yarışda həm idmançı, həm də döyüş sayı çox olub.

Mübarizələrdən əvvəl rəsmi hissədə qəfəs döyüşlərinin Gəncədə təşkilinin böyük əhəmiyyət daşıdığını bildirən çıxışçılar bu növün şəhərdə, eyni zamanda ətraf rayonlarda populyarlaşdırmaq niyyətlərinin olduğunu deyiblər. Qəfəs döyüşlərinin peşəkarlıq istiqamətində vacib rol oynadığı ifadə olunub. İlk yarışdan fərqli mübarizələrdə bir neçə rayon təmsilçiləri də qüvvəsini sınayıb. Yarı-peşəkar formatda reallaşan görüşlərdə Gəncə, Samux, Göygöl, Gədəbəy, həmçinin Ağcəbədi və Bərdə idmançıları liqada qalib olmağa çalışıblar. 30 çəkidə 30 döyüşün reallaşdığı yarışda uşaq, yeniyetmə və gənclər qüvvəsini sınayıb.

Döyüşlər böyük həyəcan və coşqu ilə izlənilib. Regiondan olan və ilk dəfə liqaya qatılan idmançıların olması isə yarışa marağı artırıb.

Qalib və mükafatçılar görüş bitdikdən dərhal sonra qəfəsdəcə medal və diplomla mükafatlandırılıblar. Pankration, Qrapplinq və MMA Federasiyasının qərb bölgəsi üzrə nümayəndəliyi bu formatda yarışları gələcəkdə daha kütləvi halda və açıq hava şəraitində keçirməyi planlayır.

Orxan Cəfərzadə