Samux rayonu üzrə bütün orta məktəblərində “Son zəng”lə bağlı silsilə tədbirlər keçirilib. Rayon İcra Hakimiyyətinin başçısı Alı Qocayev, Gəncə-Daşkəsən Regional Təhsil İdarəsinin müdiri Anar Qədiməliyev məktəblilərlə birgə “Son zəng” tədbirində iştirak ediblər. Məzunlara təbriklər çatdırılıb, son dövrdə rayonda yeni tikilən və əsaslı təmir olan məktəblərin təhsilin keyfiyyətinə müsbət təsirindən danışılıb. Bu il rayon məktəblərini 529 11-ci, 835 nəfər 9-cu sinif şagirdinin bitirdiyi vurğulanıb. Kimya üzrə respublika fənn müsabiqəsində 1-ci yer tutaraq qızıl medala layiq görülən Samux şəhər 2 saylı tam orta məktəbin 7-ci sinif şagirdi Zümrüd Ələkbərova və Beynəlxalq olimpiadada Fizika üzrə gümüş medala layiq görülən 2 saylı orta məktəbin 10-cu sinif şagirdi Sərxan Hüseynova hədiyyələr təqdim olunub. Daha sonra Lək kənd tam orta məktəbində şəhid Elyarbəy Məmmədovun oğlu Elxan Məmmədova 11-ci sinifi bitirməsi münasibətilə hədiyyələr verilib. Həmçinin İnstitut qəsəbə tam orta məktəbində tədris ili ərzində fərqlənən şagirdlərə fəxri fərmanlar və hədiyyələr təqdim olunub. Tədbir məzunların təşkil etdiyi bədii hissə ilə davam etdirilib.