Mədəniyyət Nazirliyi, Elm və Təhsil Nazirliyi, Heydər Əliyev Mərkəzinin birgə təşkilatçılığı ilə Gəncədə Birinci Uşaq İncəsənət Festivalı keçirilib. Azərbaycan xalqının Ümummilli Lideri Heydər Əliyevin 100 illik yubileyinə həsr edilən Festivalda 6-17 yaş arası uşaq və yeniyetmələr  musiqi bacarıqlarını nümayiş etdiriblər. Festivalın keçirilməsində əsas məqsəd mədəniyyət sahəsində inkişafın təmin edilməsi, uşaqların vətənpərvərlik ruhunda, mədəniyyətə, incəsənətə, adət-ənənələrimizə bağlı tərbiyə olunmasıdır. Üç mərhələdən ibarət festivalda peşəkar olaraq yəni aidiyyəti təhsil müəssisələrində təhsil alanlar və həvəskar məşğul olanlar olmaqla iki kateqoriya üzrə çıxışlar ediblər. Festivalın yekununda ən çox nominasiya üzrə iştirak etmiş və fəallıq göstərmiş şəhər və ya rayon növbəti il festivala ev sahibliyi edəcək.