Cari ilin iyul ayından başlayaraq Gəncə şəhərində Avropa Yenidənqurma və İnkişaf Bankı tərəfindən dəstəklənən Yaşıl Şəhər Fəaliyyət Planının hazırlanması ilə bağlı işlər aparılır. Bu istiqamətdə beynəlxalq və yerli ekspertlərdən ibarət məsləhətçi konsorsium yaradılıb. Heydər Əliyev Mərkəzində gerçəkləşən tədbirdə "Yaşıl şəhərlər" proqramı çərçivəsində icra olunacaq layihələrin Gəncə üçün ən aktual ekoloji problemləri, iqlim dəyişikliyi risklərini müəyyən etmək və prioritetləşdirməkdə kömək edəcəyinə diqqət çəkilib. Bundan başqa vurğulanıb ki, layihə iqlim dəyişikliyi, nəqliyyat, enerji, tullantılar, su, torpaqdan istifadə kimi məsələlərlə bağlı bir sıra sektorları əhatə edəcək. Ekspert qrupunun iştirakı ilə layihənin ilkin təqdimatı, maraqlı tərəflərlə vizyon və strateji məqsədlərlə bağlı müzakirələr aparılıb.