Gəncədə 8 noyabr Zəfər Gününə həsr olunan yunan-Roma güləşi üzrə açıq birincilik keçirilib. Yeniyetmə güləşçilər arasında baş tutan yarış yerli olimpiya idman kompleksində reallaşıb. 200-dən çox idmançının qatıldığı birincilik açıq xarakterli olduğundan Nizami yurdunun güləşçiləri ilə yanaşı, Bakı, Şuşa, Balakən, Göyçay, Mingəçevir və Şəmkir pəhləvanları da döşək üzərinə çıxıblar. 3 gün davam edən mübarizələrdə 6-7-8 yaşlılar 11, 9-10-11 yaşlı güləşçilər isə 12 çəkidə qalibi müəyyənləşdiriblər. Sonda yer tutanlar medal və diplomla təltif ediliblər.