Təhsil Nazirliyinin Kollegiyası “Dövlət ümumi təhsil müəssisələrində günüuzadılmış qrupların təşkili Qaydası”nı təsdiqləyib. Qərara əsasən, qrup valideynlərin yazılı ərizələri əsasında I-IV sinif şagirdlərindən təşkil olunacaq.Şagird qrupa tədris ilinin əvvəlində həmin tədris ili müddətinə qəbul ediləcək və şagird sayı 20-25 nəfərdən ibarət komplektləşdiriləcək. Ödənişsiz əsaslarla fəaliyyət göstərəcək qrup bir sinfin, eyni paralel siniflərin və ya bir neçə sinfin şagirdlərindən təşkil ediləcək və bu zaman onların yaş xüsusiyyətləri nəzərə alınacaq. Məşğələlər sentyabrın 15-dən iyunun 14-dək aparılacaq, həftəlik dərs norması 30 saatdan çox olmayacaq. Beşgünlük olacaq qrupda ev tapşırıqlarının yerinə yetirilməsinə istiqamət veriləcək, müstəqil öyrənmə bacarıqları aşılanacaq, cütlükdə və kiçik qruplarda öyrənmə təmin ediləcək.