Bu gün Azərbaycanda Od çərşənbəsi qeyd olunur. İlaxır çərşənbələrdən ikincisi xalq arasında "Xəbərçi", "Üskü", "Addı" çərşənbə kimi də tanınır. Bu çərşənbə qədim insanların günəşə, oda olan müqəddəs inamından irəli gəlir. Adət-ənənəyə görə, bu gün tonqal qalayıb, alovun üzərindən tullanmaqla daxildə olan bütün çirkabı və azar-bezarları yandırırlar. Növbəti - Yel çərşənbəsi martın 9-da, ilaxır - Torpaq çərşənbəsi isə martın 16-da qeyd olunacaq. Yaz fəsli ölkəmizə 20 mart saat 13:37-də daxil olacaq. Martın 20-si bayram axşamı, 21-i isə bayram günü kimi qeyd ediləcək. Od çərşənbəniz mübarək!