Ağstafada narkotik alveri ilə məşğul olan qardaşlar heroinlə saxlanılıblar. Qardaşlardan biri narkotik vasitələrin qanunsuz dövriyyəsi ilə məşğul olduğuna görə polis tərəfindən axtarışda da olub.

Ağstafa rayon polis şöbəsi əməkdaşlarının keçirdikləri əməliyyat axtarış tədbirləri nəticəsində rayon sakini əvvəllər məhkum olunmuş Elşad Yaqubov saxlanılıb. Onun üzərində şəxsi axtarış aparılan zaman külli miqdarda metafetamin və marixuana aşkar edilərək götürülüb.

Elşad Yaqubov saxlanılan şəxs:  Narkotik istifadəçisiyəm, üzərimdə narkotik gəzdirirəm. Bu an qapı döyüldü. Mən də evdəydim. Polis əməkdaşları olduqlarını bildim. Qonşunun həyətinə qaçdım. Qonşunun həyətinə qaçandan sonra polis əməkdaşları məni orada tutdu. Vəkilimlə birlikdə üzərimə baxış keçirildi və üzərimdən marixuana və şüşə çıxdı.

Davam etdirilən əməliyyat zamanı saxlanılan şəxsin cinayət ortağı olan doğma qardaşı Rəşad Yaqubov da  saxlanılıb. Onun da üzərindən külli miqdarda heroin, metafetamin və metadon həbbləri, eləcə də narkotik vasitələrin satışında istifadə olunan tərəzi aşkar edilərək götürülüb.

Eşqin Qasımov DİN-in mətbuat xidmətinin əməkdaşı: Ağstafa rayon polis şöbəsi əməkdaşlarının keçirdikləri təxirəsalınmaz əməliyyat zamanı Elşad Yaqubovun qardaşı əvvəllər məhkum olunmuş hazırda barəsində Azərbaycan Respublikası Cinayət Məcəlləsinin 234.4.3-cü maddəsi ilə axtarış elan edilən Rəşad Yaqubov saxlanılaraq rayon polis şöbəsinə gətirilib.

Qardaşlardan götürülən maddi sübutlar ekspertizaya təqdim olunub. Faktla bağlı araşdırmalar davam etdirilir.

Natiq Hüseyn