Baş Narkotiklərlə Mübarizə İdarəsinin əməkdaşları bir sıra əməliyyatlar keçiriblər. 24 kiloqramdan artıq narkotik vasitə və psixotrop maddə qanunsuz dövriyyədən çıxarılıb.

Baş İdarə əməkdaşlarının daxil olmuş əməliyyat məlumatı əsasında keçirdikləri tədbir zamanı narkotiklərin qanunsuz dövriyyəsində şübhəli bilinən Nəsimi rayon sakini, əvvəllər məhkum olunmuş Əhməd Ələkbərov saxlanılıb. Onun Xəzər rayonu Buzovna qəsəbəsində yerləşən evindən 4 kiloqram 25 qram qurudulmuş marixuana aşkar edilərək götürülüb.

Baş İdarə əməkdaşlarının Xəzər rayonu ərazisində keçirdikləri növbəti tədbir zamanı isə paytaxt sakini Hikmət Hüseynov saxlanılıb. Onun Şüvəlan qəsəbəsində yerləşən evinin həyətindən xüsusi qulluq edilərək yetişdirilən 31 ədəd çətənə bitkisi və 1 kiloqram 815 qram qurudulmuş marixuana aşkar olunaraq götürülüb.

Binəqədi rayonunda keçirilən daha bir əməliyyat zamanı paytaxt sakini, əvvəllər məhkum olunmuş Anar Qasımov polislər tərəfindən tutulub. Onun üzərində şəxsi axtarış aparılan zaman ümumi çəkisi 1 kiloqram 70 qram olan narkotik vasitə heroin aşkar olunaraq götürülüb. Baş İdarə əməkdaşlarının Abşeron rayonu ərazisində keçirdikləri daha bir tədbir zamanı paytaxt sakinləri Ramin Ələkbərov, Əbdül Umarov, Səfər Ələkbərli və Orxan Mehdiyev tutulublar. Ramin Ələkbərovun üzərində şəxsi axtarış aparılan zaman 5 qrama yaxın, onun idarə etdiyi avtomobildən isə 10 kiloqramdan artıq narkotik vasitə olan heroin aşkar olunaraq götürülüb. Onun avtomobilində sərnişin kimi olan adları sadalanan digər şəxslərdən də narkotik vasitə heroin aşkar olunaraq götürülüb. Əməliyyat tədbirlərinin davamı olaraq Ramin Ələkbərovun Bakıxanov qəsəbəsində yerləşən evindən əlavə 495 qram psixotrop maddə metamfetamin və 501 qram heroin aşkar edilib. Baş İdarə əməkdaşları tərəfindən Xətai rayonunda keçirilən sonuncu tədbir zamanı isə paytaxt sakini Telman Əliyev saxlanılıb. Onun üzərində şəxsi axtarış aparılan zaman 4 kiloqram 210 qram heroin, 2 kiloqram 20 qram tiryək və 11 qramdan artıq metamfetamin aşkar olunaraq götürülüb.

Sonuncu əməliyyatlar nəticəsində 24 kiloqramdan artıq narkotik vasitə və psixotrop maddə qanunsuz dövriyyədən çıxarılıb. Faktlarla bağlı Cinayət Məcəlləsinin müvafiq maddələri ilə cinayət işi başlanılıb, adları çəkilən şəxslərin hər biri tutularaq istintaqa təqdim olunublar. Cinayət işi üzrə zəruri istintaq və əməliyyat-axtarış tədbirləri davam etdirilir.