Bir qayda olaraq yay aylarında keçirilən ümumi təhsil müəssisələrinə müəllimlərin işə qəbulu müsabiqəsinin təxirə salınmasına dair hazırda hər hansı bir qərar yoxdur. Bu barədə Təhsil Nazirliyinin Telegram səhifəsində məlumat verilib. Qeyd edilib ki, müsabiqənin test imtahanı və müsahibə mərhələsinin təşkili ilə bağlı zəruri tədbirlər həyata keçirilir. Məlumata görə, ölkədə olan sanitar-epidemioloji vəziyyətdən və bununla bağlı tətbiq ediləcək qaydalardan asılı olaraq müvafiq qərar qəbul ediləcək və bu barədə ictimaiyyətə ətraflı məlumat veriləcək. O da vurğulanıb ki, müəllimlərin iş yerinin dəyişdirilməsi elektron qaydada həyata keçirildiyi üçün, bu il də müsabiqənin keçirilməsinə hər hansı maneə yoxdur. Elan olunacaq tarixlərdə qeydiyyatdan keçən və elektron ərizəsini təsdiq edən namizədlər iş yerini dəyişmək imkanı əldə edə biləcəklər.