Əməkdaşımız Elnur Vahidoğlu isə Göygölün heyvan satışı bazarındakı vəziyyəti öyrənib. Məlum olub ki, burada da vəziyyət ürəkaçan deyil. Bazara ətraf rayonlardan da heyvan gətirilməsinə icazə verilsə də, tələbin azlığı satıcıların işini çətinə salır.

Bura qərb bölgəsinin ən böyük mal satışı bazarıdır. Göygöldə yerləşən bu bazarda həftənin şənbə və bazar günləri səhər saatlarından başlayaraq iri və xırda buynuzlu heyvanların alış-satışı aparılır. Adətən bu mövsümdə bazarda canlama müşahidə edilirdi. İndi isə mənzərə tamamilə fərqlidir.

Aqil Böyükkişiyev satıcı: Əvvəllər heyvan çox olurdu, rayonlardan kəndlərdən gətirib satırdılar. İndi koronavirusla bağlı gətirilən heyvan satılmır, alıcı qüvvəsi çox zəifdi, gələn yoxdu. Gətirdiymiz malı sata bilmirik qaytarırıq, alan yoxdu. Balaca dananı 400 manata, yekə dananı isə 1000 manata verirəm, qiymətlər yaxşıdı. Bazara heç kim gələ bilmir, hamının heyvanı qapısında qalıb, gətirə bilmir.

Xırdabuynuzlu heyvanların satıldığı ərazidə də vəziyyət eynidir. Qiymətlərdə artım müşahidə olunmur. Gəl ki, aşağı qiymətlər də alıcı cəlb etmir. Heyvan almaq üçün gələn az sayda müştərilər isə təklifin azlığından gileylidirlər.

Maarif Əliyev satıcı:Şəmkir şəhərindən gəlmişəm. Qoyun, keçi, quzu gətirmişəm. Karantin rejiminə görə alıcılığa da, satıcılığada təsir edib. Makam, əlcəklərim var. Arayışla öz heyvanımı satmağa gətirmişəm. Qiymətlərdə əvvəlki kimidir.

Mirməhəmməd Məmmədov alıcı:Mən saxlamaq üçün yanı balalı qoyun almaq istəyirdim. O da heyvan çox azdı.

Heyvanların alqı-satqısından fərqli olaraq, ot bazarında vəziyyət qənaətbəxşdir. Burada alan da var, satan da. Üstəlik qiymətlər də hər iki tərəfi qane edir. Otun bir bağlaması 6-7 manata təklif olunur.

Qəmbər Məmmədov satıcı:Yevlax şəhərinin Səmədabad kəndindən otu gətirmişik ki, sataq. Yavaş-yavaş satırıq, qabağa baxanda qiymətlərdə düşüb. Ot biçini sezonu başladığı üçün qiymətlər də düşür.

Bazarda karantin rejimi qaydalarına ciddi riayət olunur. Ərazidə mütəmadi şəkildə dezinfeksiya işləri də aparılır.