İlin sonuna kimi Gəncənin daha iki prospekti və 5 küçəsi müasir işıqlandırma sistemləri ilə aydınlanacaq. Qeyd olunan ərazilərdə 5 mindən çox yeni işıqlandırma dirəkləri quraşdırılacaq.

Bu günədək şəhərin demək olar ki, 60 faizdən çox ərazisi yeni işıqlandırma sistemləri ilə təchiz olunub. İşlər əsasən infrastruktur layihələrin başa çatdığı küçə və prospektlərdə mərhələli olaraq icra edilir. İlin əvvəlindən başlayaraq Gəncənin Bakı istiqamətindən girişində və Nizami prospektinin bir hissəsində, Azərbaycan Bayrağı, İsax Cəfərov, Bağmanlar və Təbriz küçələrində 1000-ə yaxın müasir tipli “led” işıq sistemli dirəklər quraşdırılıb. Mərkəzdən kənar qəsəbələr də diqqətdən kənarda qalmır.

Akif Qəmbərov – iş icraçısı: Gəncə şəhərində aparılan işlərdən biri də Hacıkənd qəsəbəsidir. Orada yeraltı xətlər və 134 dayaq quraşdırılaraq  işlər tam başa çatdırılıb. Bundan əlavə olaraq şəhərin İsrafil Məmmədov, Təbriz, Üzeyr Hacıbəyov, Fətəli Xan Xoyski küçələrində işlərə yekun vurulub.

Hazırda küçələrin işıqlandırılması yerli istehsal hesabına həyata keçirilir. Gəncə Cihazqayırma zavodunun istehsalı olan işıqlandırıcılar bir çox parametrlərinə görə daha əlverişli hesab olunur.

Akif Qəmbərov – iş icraçısı: Gəncə Cihazqayırma zavodunun istehsal etdiyi işıqlandırma cihazları xaricdən gətirilən işıqlandırma sistemlərindən həm qənaət həm də dözümlülük baxımından daha sərfəlidi.

Gəncə şəhər Mənzil Komunal Təsərrüfatı İstehsalat Birliyi şəhərin bütün işqlandırma sistemini yerli istehsal hesabına dəyişmək niyyətindədir. İlin sonuna kimi Nəriman Nərimanov və Atabəylər prospekti ilə yanaşı, İsmət Qayıbov, Ozan, Azərbaycan və Tbilisi küçələri də yeni işıqlandırma sistemləri ilə təchiz olunacaq.

Elton Cabbarlı