Bakı 2017 İslam Həmrəyliyi Oyunlarında Azərbaycan yığmasının imza atdığı möhtəşəm uğurlarda Gəncə idmançılarının da payı var. Nizami yurdunun yetirmələri İslamiadada 2 ən yüksək əyarlı mükafat qazanıblar.

Qızıl medallardan biri kollektiv, digər fərdi yarışlarda əldə edilib. Basketbolun 3X3 növündə kişilərdən ibarət milli komandanın heyətində çıxış edən Amil Həmzəyev İslam Oyunlarının qalibi olub.

Rizvan Səfərov- Amil Həmzəyevin məşqçisi:  “Amil klassik basketbolçudur, 3x3 basketbolda oyun xüsusiyyətləri tamam fərqlidir. Amma Həmzəyev adaptasiya olmaqla qarşısına məqsəd qoyub yüksək formada yarışa hazırlaşdı. Bundan öncə Bakı 2015 ilk Avropa Oyunlarında zədələndiyindən ümidləri doğrulda bilməmişdi. Bu dəfə isə ciddi formada hazırlaşıb, çempion oldu. Azərbaycanın, o cümlədən Gəncənin fəxri bizi qızıl medalla sevindirdi”.

Azərbaycan basketbolçularının İslamiadada göstərdiyi yüksək oyun keyfiyyətlərindən danışan təcrübəli mütəxəssis millinin layiq olduğu qələbəni qazandığını deyib. Rizvan Səfərov yığmamızın yarışın əsas favoriti Qətərdən çəkinmədiyini və finalda dünya çempionları ilə oyuna ciddi yanaşıb sonda uğurlu nəticə əldə etdiyini bildirib.

Rizvan Səfərov- Amil Həmzəyevin məşqçisi: “Bakı şəhərində olub basketbol oyunlarının hamısını izlədim. İlk öncədən yarışın favoritləri müəyyənləşmişdi. Türkmənistan və Qətər kimi güclü rəqiblər vardı. Dünya çempionu olan sonuncularla yığmamız yarımfinalda da qarşılaşa bilərdi. Ona görə də millimiz oyunlara tam ciddi yanaşıb əla çıxış etdi. Basketbolçularımız finalda da qalib gəlib Azərbaycana qızıl medalları qazandırdılar”.

Gəncə idmançılarından digər qızıl medalı Ramil Qasımov aktivinə yazıb. Paralimpiyaçı cüdo yarışlarında fəxri kürsünün ən yüksək pilləsinə qalxıb. Rio 2016-nın qalibi olan Qasımov həm də dünya və Avropa çempionudur.

Əli Hacıyev- Ramil Qasımovun məşqçisi: “Ramil Qasımovda bütün idman titulları var. Onun çıxışını dövlətimiz yüksək səviyyədə qiymətləndirib və bu, Ramilə ruh verir. O, hər zaman Respublikamızın adını yüksəltməyə hazırdır, mən buna inanıram. Ramil ciddi idmançıdır və hər zaman öz üzərində işləyir”.

İslam Oyunlarında Gəncə boks məktəbinin iki yetirməsi qüvvəsini sınasa da, onlardan heç biri mükafatçılar sırasına düşə bilməyib. Elvin İsayev və Rüfət Hüseynov medalsız qalıb. 

Azad Rəfi