Son zamanlar bir çox smartfon istehsalçıları, o cümlədən Apple, Huawei və LG, öz flaqman mobil cihazlarını bir cüt əsas kamera ilə təchiz edirlər. Digər şirkətlər bir cüt qarşı kameranı təcrübədən keçiriblər. İndi isə Alcatel bütün bunları bir smartfonda cəmləşdirməyə qərar verib və dünyada ilk dəfə iki cüt kameralı smartfon təqdim edib. Alcatel Flash biri rəngli, o biri isə ağ-qara çəkən 13 Mp-lik əsas kameralarla təchiz olunub. Kameraya həmçinin fazalı avtofokus və iki rəngli ani işıq quraşdırılıb. O biri tərəfdəki ön kamera öz növbəsində 8 və 5 meqapiksellik moduldan ibarətdir. Alcatel Flash-in digər xarakteristikalarından 5,5 düymlük Full HD ekran, 10 nüvəli Helio X20 prosessoru, 3 Qb operativ və 32 Qb əsas yaddaşı, eləcə də microSD üçün girişi qeyd etmək olar. Barmaq izlərini tanıyan sensor cihazın arxa hissəsində yerləşdirilib. 3100 mAs həcmli batareyaya sahib smartfon Android 6.0 Marshmallow idarəetməsi ilə işləyir. Aparatın qiyməti və nə vaxt bazara çıxacağı barədə isə xəbər yoxdur.

Cavanşir Məmmədzadə