Klub meydandakı mübarizəsi ilə yanaşı, ondan kənarda da müəyyən məsələləri yoluna qoymalıdır.

Söhbət əlbəttə ki, Premyer Liqa üçün tələb olunan lisenziya meyarlarının yerinə yetirilməsindən gedir. Çünki, elitaya dönmək üçün təkcə nəticə qazanmaq kifayət etmir, həm də AFFA-nın Lisenziyalaşdırma Qrupu tərəfindən tələb olunan sənədləri standartlara cavab verən qaydada quruma təqdim etmək əsas vəzifələrdəndir.

Klub rəhbərliyi Premyer Liqa yolunda mövcud şəraiti yaxşılaşdırmağa, infrastrukturu yeniləməyə çalışır. Bu mənada ilk növbədə, komandanın baza kimi yararlandığı, ev oyunlarını keçirdiyi Olimpiya İdman Kompleksinin stadionu elita üçün uyğun vəziyyətə gətirilməlidir.

Premyer Liqaya vəsiqə qazanmağa əsas namizədlərdən sayılan “Şəmkir” birinci divizionda ilk dövrədən sonra turnir cədvəlində 3-cü pillədə qərarlaşıb. “Qırmızı-ağlar” sonuncu dəfə 12 il öncə elitada çıxış ediblər. Komanda 7 ildir ki, aşağı liqada mübarizə aparır.
 

Azad Rəfi