Futbol veteranlarından ibarət Azərbaycan milli komandası Gürcüstanın paytaxtı Tbilisidə keçirilən “Qış Kuboku” turnirində iştirak edib. Beynəlxalq status daşıyan mini-futbol yarışı 1 il əvvəl faciəvi şəkildə dünyasını dəyişmiş sabiq futbolçu və UEFA meneceri David Petriaşvilinin xatirəsinə həsr olunub.  

Gürcüstan və Azərbaycanla yanaşı, İspaniya, Türkiyə, Ukrayna və UEFA-nın yığma komandasının da qatıldığı turnirdə millimiz qrupda iki oyun keçirib. Yarımfinala vəsiqə qazanmaq üçün yığmamız İspaniya və Ukraynanın futbol veteranları ilə mübarizə aparıb. Komandamızın qonşu ölkəyə yollanan heyətində vaxtilə “Kəpəz”də çıxış etmiş Hüseyn Məhəmmədov, Arif Əsədov, Əli Abışov, Mahmud Qurbanov və Vidadi Rzayev yer alıb.

Vidadi Rzayev- futbol veteranı: “Yaxşı təəssüratlarla vətənə dönmüşük. Əvvəlcədən yarış təşkilatçılarına minnətdarlığımı bildirirəm ki, ötənlərin məşhur futbolçularını bir yerə yığmışdılar. Turnir yüksək səviyyədə düzənlənmişdi. Rəqiblərimizdən olan Ukrayna və İspaniya yığmalarının heyətində dövrünün ən güclü futbolçuları yer almışdı. Onlara qarşı mübarizə aparmaq bizə gözəl hisslər yaşatdı. Belə yarışlarda əsas önəmli olan veteranların bir araya gəlməsidir”.
Gəncə klubunda 19 yaşlı futbolçulardan ibarət komandanın baş məşqçisi olan Vidadi Rzayevin istəyi bu kimi yarışların mütamadi keçirilməsidir. Veteranların bir araya gəlməsi baxımından belə turnirləri vacib hesab edən Rzayevin ayrıca təklifi də var.

Vidadi Rzayev- futbol veteranı: “Belə turnirlərin keçirilməsini müsbət qiymətləndirirəm. Düşünürəm ki, bu kimi yarışlar tez-tez təşkil olunsa, daha yaxşı olar. Gürcüstan, İspaniya, Rusiya və Ukraynada veteranlar arasında çempionatlar keçirilir. Düzdür, bir ara Qəbələ, Oğuz, Naxçıvan və digər yerlərdə gedib oynadıq. Müntəzəm çempionat keçirilsə, veteranlardan ibarət yığmamız da xarici turnirlərə daha hazırlıqlı gedər və nəticə də qazanar”.

Vidadi Rzayev “Qış Kuboku” turnirində millimizin keçirdiyi hər iki oyunda start heyətdə meydana çıxsa da, fərqlənə bilməyib. O ki, qaldı yarışın qalibinə yığmamızla qrupda heç-heçə oynayan ukraynalılar finalda ev sahiblərinə uduzaraq gürcülərin çempion olmasına şərait yaradıblar.

Azad Rəfi