Dünən Tərtərin işğaldan azad edilən Talış kəndi ərazisində - Goranboyun Tapqaraqoyunlu kəndi istiqamətində insan tələfatı ilə nəticələnən mina partlayışının bəzi təfərrüatları məlum olub. Hadisənin baş verdiyi ərazi əvvəllər qoşunların təmas xətti olub. ANAMA əməkdaşlarının hərəkət etdikləri yolda qalın ot örtüyü olub. Hadisənin baş verdiyi ərazidə tank əleyhinə mina basdırılıbmış. Hərəkətdə olan avtomobil şahmat üsulu ilə basdırılan minalardan birinə toxunub. Partlayış zamanı avtomobil yoldan kənara düşüb. Partlayan minanın tank əleyhinə “TM62 PM” markalı mina olduğu qeyd edilib. Hadisə nəticəsində ölən şəxslər ANAMA-nın dronla minaaxtarma komandasının üzvü olan 1981-ci il təvəllüdlü Səxavət Gözəlov, 1982-ci il təvəllüdlü Nadir Yusifov və 1996-cı il təvəllüdlü Fərid Sədiyevdir. Faktla bağlı cinayət işi başlanıb.