Yevlaxda qətl törədilib. Bu gün günorta saatlarında Qaraoğlan kəndi ərazisində 38 yaşlı Səfərov Xəyal Qəmbər oğlunun üzərində odlu silah yarası olan meyitinin aşkarlanması barədə Yevlax rayon prokurorluğuna məlumat daxil olub. Prokurorluq əməkdaşları məhkəmə-tibb ekspertinin iştirakı ilə hadisə yerinə və meyitə baxış keçiriblər. İlkin araşdırmalarla zərərçəkənin qonşusu, 31 yaşlı Qorxmaz Həsənəliyevin şəxsi münasibətlər zəminində aralarında yaranmış mübahisə zamanı odlu silahdan atəş açaraq Xəyal Səfərovu qəsdən öldürməsinə əsaslı şübhələr müəyyən edilib. Faktla bağlı Cinayət Məcəlləsinin qəsdən adam öldürmə maddəsi ilə cinayət işi başlanıb. Həsənəliyev şübhəli şəxs qismində tutularaq istintaqa cəlb edilib.