Bu, yol-nəqliyyat hadisələrinin bugunkü nəticələridir.

Yol-nəqliyyat hadisələrindən biri, Cəlilabadın Qarazəncir kəndi ərazisində baş verib. “Mercedes” markalı minik avtomobili Astara istiqamətində hərəkətdə olarkən, qarşıdan gələn avtobusla toqquşub. İdarəetməni itirən sürücü avtomobili dirəyə çırpıb. Bakı şəhər sakini 42 yaşlı Həcər Bayramova aldığı çoxsayılı bədən xəsarətlərindən hadisə yerində keçinib. Onun həyat yoldaşı, avtomobilin sürücüsü Musa Bayramovun vəziyyətinin normal olduğu bildirilir. 
 

Muğanlı-İsmayıllı avtomobil yolunun İsmayıllı şəhəri ərazisindən keçən hissəsində də yol qəzası olub. Diyallı kənd sakini 23 yaşlı Seyran Nuğayev  idarə etdiyi “VAZ 21 015” markalı avtomobillə hərəkətdə olarkən idarəetməni itirib. Avtomobil yoldan çıxaraq elektrik dirəyinə çırpılıb. Sərnişin, Diyallı kənd sakini, 23 yaşlı Sənan Şəmiyev aldığı ağır bədən xəsarətləri səbəbindən hadisə yerində dünyasını dəyişib. Seyran Nuğayev isə müxtəlif dərəcəli bədən xəsarətləri ilə İsmayıllı rayon Mərkəzi Xəstəxanasına yerləşdirilib.

Bakı-Quba-Rusiya Federasiyası dövlət sərhədi yolunun Qubanın İqrıq kəndi ərazisindən keçən hissəsində “QAZ 31” markalı maşınla “NAZ Lifan” markalı avtomobil toqquşub.
Qəza nəticəsində 3 nəfər müxtəlif dərəcəli bədən xəsarətləri alıb. Onlar xəstəxanaya yerləşdiriliblər, vəziyyətləri orta ağırdır.
Faktlarla bağlı araşdırma aparılır.

Ruhəngiz Hacızadə