Qazax Rayon Polis Şöbəsinin təşkilatçılığı ilə rayonun Gənclər Evində “Narkomaniyaya qarşı mübarizə və gəncləri zərərli vərdişlərdən qoruyaq” mövzusunda maarifləndirmə tədbiri keçirilib. Bakı Dövlət Universitetinin Qazax filialının tələbələri qarşısında çıxış edən Rayon Polis Şöbəsinin rəisi Sənan Əsədov narkomaniya və narkotiklərin qanunsuz dövriyyəsinə qarşı mübarizə tədbirlərindən danışıb. Narkomaniyanın digər cinayətlər, zorakılıq hallarının artmasına rəvac verdiyi, QİÇS-in və başqa ağır xəstəliklərin sürətlə yayılmasını stimullaşdırdığını deyib. Bunların isə cəmiyyətin inkişafını ləngitdiyi, ailə dəyərlərinin məhvinə, mənəvi deqradasiyaya səbəb olduğu qeyd edilib. Narkomaniyanın qorxulu zərərindən məlumatsız gənclərin bu bəlanın əsirinə çevrildiyi bildirilib. Rayon Prokuroru Rauf Gözəlov dövlət tərəfindən narkomanlıqla mübarizə üçün bütün lazımi addımlar atıldığını diqqətə çatdırıb. Xüsusən yeniyetmə və gənclərin məşğulluğu, yüksək təhsili, idmanla məşğul olmaları üçün hər cür zəruri şərait yaradıldığı önə çəkilib. Görüşün sonunda narkotiklərin zərərli təsiri ilə bağlı videoçarx izlənilib, tələbələri maraqlandıran suallar cavablandırılıb.