Dövlət İmtahan Mərkəzi tərəfindən gələn ilin 14 yanvar tarixində ali təhsil müəssisələrinin magistraturalarına qəbul olmaq istəyənlər üçün yeni imtahan modelinə uyğun sınaq imtahanı keçiriləcək. DİM-in məlumatına görə, imtahan Bakı, Gəncə və Naxçıvan şəhərlərində təşkil olunacaq. Sınaq imtahanında iştirak etmək istəyənlər 25 dekabrdan başlayaraq 7 yanvar saat 12:00-dək DİM-in internet saytında qeydiyyatdan keçməklə imtahana yazıla bilərlər. Sınaq imtahanında iştirak etmək üçün ödənişin məbləği 40 manatdır. Magistratura səviyyəsinə qəbul imtahanının I cəhdinin 2024-cü il fevral və ya mart aylarında keçirilməsi nəzərdə tutulur.