Təhsil Nazirliyi sistemində fəaliyyət göstərən məktəbdənkənar təhsil müəssisələrinin qrup və dərnəklərinə cəlb edilən məktəblilər üçün onlayn formatda dərslər keçirilir. Bu yöndə fəaliyyət müəyyən olunmuş qrafikə uyğun olaraq ev şəraitində keçirilməsi mümkün olan istiqamətlər üzrə təşkil edilir.

Evdə onlayn dərs keçənlər arasında Gəncə şəhər 1 saylı Uşaq Gənclər İdman Şahmat Məktəbinin futbol bölməsinin məşqçi müəllimi Turan Əliyev də var. Gənc mütəxəssis müasir texnologiyaların imkanlarından yararlanmaqla yetirmələri üçün məşq prosesi təşkil edir. O, dərs müddətində uşaqlar üçün mövzuya uyğun sual-cavab və fikir mübadiləsi aparmaq imkanı yaradır.

Bir müddətdir ki, ölkəmizdə koronavirus infeksiyasının yarada biləcəyi təhlükənin qarşısının alınması məqsədilə bütün təhsil idman müəssisələrində tədris prosesi müvəqqəti olaraq dayandırılılıb. Onlayn keçirilən məşqlərin məqsədi məktəblilərin ev şəraitində asudə vaxtlarının səmərəli keçirilməsinə nail olmaq, onların fiziki hazırlıq imkanlarının inkişaf etdirilməsinə çalışmaqdır.

Birinci dərəcəli məşqçi olan Turan Əliyev UEFA-nın müxtəlif seminarlarında iştirak edib. D kateqoriyasına malikdir. O, 2013-cü ildən idman məktəbində uşaqlara futbolun sirlərini öyrədir.