Lənkəran-Boradigah yolunun Girdəni kəndindən keçən hissəsində qəza baş verib. Əks istiqamətlərdə hərəkət edən Havzava kənd sakini 57 yaşlı Allahverdi İmaməliyevin idarə etdiyi Vaz markalı minik avtomobili, həmkəndlisi, 21 yaşlı Ravin Şükürovun idarə etdiyi digər Vaz markalı avtomobillə toqquşub. Nəticədə sürücü Allahverdi İmaməliyev aldığı ağır bədən xəsarətlərindən hadisə yerində dünyasını dəyişib. Sürücünün meyidi deformasiyaya uğrayan avtomobildən çıxarılaraq aidiyyatı üzrə təhvil verilib. Həmin avtomobilin sərnişini 47 yaşlı Havzava kənd sakini Təranə Tağıyeva və Vaz-ın sürücüsü Ravin Şükürov Lənkəran Rayon Mərkəzi Xəstəxanasına çatdırılıb. İlkin melumata görə qəzaya sıx dumanlı hava şəraitində sürətin düzgün seçilməməsi səbəb olub.

Goranboyda da yol qəzası baş verib. Yevlax sakini Famil İsmayılovun idarə etdiyi "Lifan" markalı avtomobilin traktorun qoşqusuna çırpılması nəticəsində sürücü də daxil olmaqla 5 nəfər xəsarət alıb. Famil, Elburus, Xurmayə, Vüqar və Ramiz İsmayılovlar xəstəxanaya yerləşdiriliblər. Vəziyyətlərinin normal olduğu bildirilir.

İsmayıllı rayon sakini Novruz Həsrətov "Vaz 014" markalı minik avtomobili ilə rayonunun Heydər Əliyev pospekti istiqamətində hərəkətdə olarkən qəfildən idarəetməni itirib. Və yol kənarında olan piyada, 25 yaşlı Mətləb Osmanovu vurub. Ağır bədən xəsarətləri alan gənc təcili olaraq İsmayıllı rayon Mərkəzi Xəstəxanasının reanimasiya şöbəsinə yerləşdirilib. Vəziyyəti ağır olaraq qiymətləndirilir. Faktlarla bağlı araşdırma aparılır.