Yeni texnologiyaya əsaslanaraq hazırlanan şərablar. Azərbaycan Texnologiya Universitetinin Qida Mühəndisliyi və Ekspertiza kafedrasında “Tokay” şərabının yeni texnologiya əsasında hazırlanması istiqamətində də iş aparılır. Eləcə də şərabların tədqiqi də həyata keçirilir. Prosesdə tələbələr də iştirak edir.

Adını istehsal edildiyi Macarıstanın “Tokay” şəhərindən götürən şərabın xüsusi hazırlanma texnologiyası var. Şərabın əsas özəlliyi, hazırlanarkən spirtləmə əməliyyatının aparılmamasıdır. Bu proses təbii qıçqırma yolu ilə həyata keçirilir. Hələ sahədəykən üzüm salxımı seçilir və burulur. Bu üsul üzümun tərkibindəki şəkər faizini artırır.

Əhəd Nəbiyev - ATU-nun Qida Mühəndisliyi və Ekspertiza kafedrasının müdiri: “Biz isə “Tokay” şərabını başqa texnologiya ilə hazırlamağı qarşımıza məqsəd qoymusuq. Bu texnologiyanın müəyyən dərəcədə əksinə çıxmışıq, ona görə ki, üzüm sahədə burulanda, soluxdurulanda onun tərkibindəki qida maaddələrinin parçalanması prosesi baş verir. Düzdür, şəkərin konsentrasiyası artır, ancaq tərkibindəki qida maddələri parçalanır. Hazırda bu istiqamətdə iş gedir. İlk emal prosesində apardığımız tədqiqat işindən yeni nəticələr əldə etmişik”.

Əldə edilən nəticələr əsasında hazırlanan “Alagöz” və “Qaragöz” şərabları isə UTECA brendi olan süfrə şərablarıdır. “Qaragöz”ün hazırlanmasında qırmızı üzüm sortlrarı olan “Kaberne-Sevinyon” və “Mədrəsə”dən, “Alagöz”ün hazırlanmasında isə ağ üzüm sortları olan “Rikostel” və “Bayanşirə”dən istifadə olunub. Bir neçə texnologiyadan istifadə edilsə də, şərabların hazırlanmasında üstünlük klassik üsula verilib.

Əhəd Nəbiyev - ATU-nun Qida Mühəndisliyi və Ekspertiza kafedrasının müdiri: “Üzüm yığıldıqdan sonra o, əzilmiş, şirə hissə əzinti ilə birlikdə bir neçə gün qıcqırdıqdan sonra əzinti hissə ayrılmışdır. Şirə əzinti ilə saxlanılan müddətdə mütəmadi olaraq qarışdırırıldi ki, qabıq və lətli hissəsinin tərkibində olan qida maaddələri şirənin tərkibinə keçsin. Bilirsiniz ki, onun tərkibində çoxlu fenol birləşmələri var. Həmin o fenol birləşmələri antioksidant, antimikrob xassəyə malikdirlər. Həmin o fenol birləşmələrinin şərabda çox olması şərabın gələcəkdə xəstəliyə tutulmasının qarşısını alır”.

Ekoloji təmiz məhsullar bu günə kimi Gəncədə təşkil olunan 4 şərab festivalında nümayiş etdirilib. Dequstasiyası keçirilən məhsulların keyfiyyəti mütəxəsislər tərəfindən yüksək qiymətləndirilib və kütləvi istehsalı planlaşdırılır.