Buraxılış və qəbul imtahanlarında qüsursuz fəaliyyətinə görə nəzarətçi-müəllimlər mükafatlandırılıb. Dövlət İmtahan Mərkəzi tərəfindən aparılan imtahanların statistik araşdırılması nəticəsində Gəncənin 4 və 42 nömrəli tam orta məktəbinin 2 müəllimi fəxri fərmana layiq görülüb. 146 müəllimə isə imtahanlarda qüsursuz nəzarət apardığına görə təşəkkürnamə elan edilib. Dövlət İmtahan Mərkəzinin Gəncə Regional Bölməsində keçirilən mükafatlandırma mərasiminə Mərkəzin direktorlar şurasının sədri Məleykə Abbaszadə onlayn formada qatılaraq müəllimlərə uğurlar arzulayıb.

Nəsimi Məmmədov - Dövlət İmtahan Mərkəzinin Gəncə Regional Bölməsinin müdiri: Hər il olduğu kimi bu ildə ümumi göstəricilər çox yüksəkdir. Respublika üzrə köçürmə faizi 3 faizdən çox olduğu halda Gəncədə köçürmə faizi 1 faiz olmuşdur. Respublika üzrə hər il 30 ümumtəhsil müəsisələrinin ümumi nəzarətçilərinin göstəriciləri hesablanarkən Azərbaycan Dövlət Aqrar Universitetinin 33 müəllimi hər il təşəkkürnamə alan müəllimlər içərisində 1-ci yerdədir. Respublika üzrə onu deyə bilərik ki, ümumi nəzarətçilərin imtahanlara cəlb olunma faizi və imtahanlarda yüksək qiymətləndirmə faizi təbii ki, Gəncənin imtahan nəzarətçi bazaları 1-ci yerdə dayanır.

Rauf Abışov - imtahan nəzarətçisi: 2012- ci ildən DİM-in iştirakçısıyam, imtahanlarda iştirak edirəm. Çalışmışam bu 5 ildə imtahanları təlimata uyğun, şəffaf və vicdanla idarə edim. Və çalışacam ki bundan sonrada bu məsuliyyəti qoruyub saxlayım.