Şəmkirdə Azərbaycanın tanınmış qrossmeysteri, Avropa çempionu mərhum Vüqar Həşimovun xatirəsinə həsr olunan şahmat üzrə beynəlxalq superturnir başlayıb. Yarışın təntənəli açılış mərasimi aprelin 20-də Şəmkirdəki Heydər Əliyev Mərkəzində reallaşıb. Dünyanın ən güclü turnirləri sırasında olan Vüqar Həşimov Memorialında bu dəfə də FİDE reytinqində yüksək yerlərdə qərarlaşan 10 iti zəka sahibi mübarizə aparacaq. Superturnirdə azərbaycanlı qrossmeysterlər Şəhriyar Məmmədyarov və Teymur Rəcəbov ilə yanaşı, sabiq dünya çempionları - Vladimir Kramnik, Veselin Topalov, Uesli So, Sergey Karyakin, Maykl Adams, Pentala Harikrişna, Pavel Elyanov və Radoslav Voytaşek iştirak edəcək.

Yarışın reytinq favoriti ABŞ şahmatçısı Uesli Sodur. Qrossmeyster hazırda Beynəlxalq Şahmat Federasiyasının reytinq cədvəlində 2-ci pillədə qərarlaşıb.

9 turdan ibarət yarışa aprelin 30-da yekun vurulacaq.

Xatırladaq ki, 2014 və 2015-ci illərdə dünya çempionu Maqnus Karlsen yarışın qalibi olub. Ötənilki turnirdə isə azərbaycanlı şahmatçı Şəhriyar Məmmədyarov birinci yeri tutub.

Püşkün nəticəsinə əsasən, ilk turda təmsilçilərimizdən Teymur Rəcəbov ukraynalı Pavel Elyanovla, Şəhriyar Məmmədyarov isə hindistanlı ABŞ şahmatçısı Uesli So ilə üz-üzə gələcək.

Digər cütlüklər isə belə müəyyənləşib:

Radoslav Voytaşek(Polşa) - Vladimir Kramnik(Bolqarıstan)

Veselin Topalov(Bolqarıstan) - Maykl Adams(Böyük Britaniya)

Sergey Karyakin(Rusiya) - Pentala Harikrişna(Hindistan)

Azad Rəfi