Bu gün UEFA Çempionlar Liqasında 1/8 finalın daha iki oyunu -  “Porto” – “Yuventus” və “Sevilya” – “Lester” görüşləri keçiriləcək və bu matçlarla mərhələnin ilk oyunlarına yekun vurulacaq.

“Porto” G qrupunun ikincisi kimi növbəti mərhələyə adladığı halda, “Yuventus” H qrupunda birinci olmağı bacarmışdı. Turin təmsilçisi Liqanın cari mövsümündə hələ məğlubiyyətlə üzləşməyib. “Yuve” A seriyasındada işləri yolunda gedir. Son turu böyük hesablı qələbə ilə başa vuran qoca sinyora turnir cədvəlinə başçılıq edir. İtalyanlar qarşıdakı matça itkilərlə çıxacaq. Belə ki, Corcio Kyellini və Andrea Barzalyi zədəli olduğu üçün onların bu görüşdə iştirakı sual altındadı.

Portuqaliya çempionatında ötən həftə darmadağınla qalib gələn “Portu”unun heyətlə bağlı problemi yoxdur, komandada hər şey qaydasındadır. Daxili arenada yalnız “Benfika”dan geri qalan əjdahalar kağız üzərində Yuventusdan zəif görünür və çoxları cütün qalibinin məhz turnirlilər olacağını düşünürlər. Bu oyun həm də dövrünün iki ən güclü qapıçısı olan İker Kasilyas – Canluici Buffon qarşıdurması kimi xarakterizə olunur. Tərəflər UEFA turnirlərində 17-ci dəfə üz-üzə gələcəklər. 

İngiltərə çempionu “Lester”i qəbul edəcək “Sevilya”da cütün favoriti favoriti hesab edilir. “Tülkülər” ötən mövsüm Premyer Liqada qarşısıalınmaz olsalar da, bu mövsüm işləri qaydasında getmir. Təsadüfi deyil ki, Klaudio Ranyerinin yetirmələri çempionatda 25 turdan sonra 17-ci pillədə qərarlaşıblar. “Lester” Premyer Liqadakı uğursuzluğu Çempionlar Liqasında yaxşı nəticə qazanmaqla unutdurmaq istəyir. Qrup mərhələsində birinci olan “tülkülər”in 1/8 final mərhələsindən hansı nəticə ilə ayrılacağı maraqla gözlənilir.

“Sevilya” da cari mövsümdə iddiasını ortaya qoyur. La Liqa “Real”I məğlub etməklə diqqətləri üzərinə çəkən andalusiyalılar çempionatda 3-cü pillədə qərarlaşıblar. Bu mənada, “Sevilya” ilə duel “Lester” üçün heç də asan olmayacaq. İspanların heyətində yeganə itki cəzalı olan Merkadodur. İngiltərə klubunda isə cəzalı olmasa da, zədəlilər var. Vaqenin oynamayacağı dəqiqdirsə, Leonardo Ulyoa və İslam Slimanınin durumu sual altındadır.   

UEFA Çempionlar Liqası 1/8 final mərhələsi, ilk oyunlar

22 fevral

23:45. “Porto” (Portuqaliya) – “Yuventus” (İtaliya)

23:45. “Sevilya” (İspaniya) – “Lester” (İngiltərə)

Azad Rəfi