• KƏPƏZ TV
    canlı yayım
Bu günə xəbərlərin oxunma sayı: 1875
— 31.10.2014 15:54

Karateçilərimiz Dünya Kuboku uğrunda yarışdan 8 medalla dönüblər

 

 

Gəncə karateçiləri Gürcüstanda reallaşan Dünya Kuboku uğrunda yarışda uğurla çıxış ediblər. 2 nömrəli Uşaq Gənclər İdman Məktəbinin yetirmələri qonşu ölkədən 8 medalla qayıdıb.

Paytaxt Tbilisidə düzənlənən mötəbət yarış karatenin WKF versiyası üzrə keçirilib. Dünya Kubokuna 9 idmançı ilə qatılan məşqçi Ramiz İbrahimovun başçılıq etdiyi komanda 4 qızıl, 2 gümüş və 2 bürünc medal qazanıb. Uşaqlar arasında Çoşqun Talıbovla Eldar Şükürov, veteranların birinciliyində Ruslan Məmmədov, kişilərin mübarizəsində isə Bayram Məmmədov Gürcüstanda baş mükafata layiq görülüb.

Bayram Məmmədov- Dünya Kubokunun qalibi: “Dörd rəqiblə mübarizə apardım. Birincisi Özbəkistan yığmasının üzvü idi. Ona qalib gəldim. Sonra rusiyalı idmançı üzərində qalib oldum. Yarımfinal və finalda gürcü karateçilərindən üstün olub çempion adını qazandım”.

Gümüş medallar uşaqlar arasında çıxış edən Röyal İbrahimli və yeniyetmələrdə bacarığını ortaya qoyan Emil Hətəminin aktivinə yazılıb. Bürünc mükafatlara uşaqların mübarizəsində Ramiz Abbaszadə və Vüqar Abdurrahmanov  sahib olub.

Ramiz İbrahimov- məşqçi: “Böyük yarışlarda nəticə vermək üçün illərlə çalışmaq, əziyyət çəkmək lazımdır. Biz də taktiki, texniki cəhətdən yaxşı hazırlaşmışdıq. Bunun da nəticəsində qalibiyyət qazandıq”.

Karateçilər ilin sonuna kimi daha bir məsul yarışda – ölkə çempionatında iştirak edəcəklər. Gələn ilin əvvəlində isə idmançılar Gürcüstanda bu dəfə dünya çempionatında qüvvəsini sınayacaq.